Main hoon....

Main nahin hoon
Main nahin hoon
Main nahin hoon

kar lo bharosa
kar lo bharosa
kar lo bharosa

main nahin hoon ........

hua kya? (shayad nahin !!! kyun???)

vishwash shabd nahin hai
thareer aur uske mayne nahin hai,
subah jab tumhari aankhon mein
dhoop girti hai
koi tumhari orkut mein
scrap nahin karta
aur na hi koi phone karta hai
ki suraj uga hai
phir bhi tumm jan jate ho
ki martand hai...

ye anubhav ki aashtha hai
shabd ka vishwash nahin

thik vaise hi tumm lakh baar
meri aankhon se mujhi ko kah do
main nahin hoon...

mere jism ko mita kar
prashant se kah do
nishal nahin hai...

main anant-nirantar
main maya-pashan
main nimish-netra

amukhar
akhamosh
amaun

hooooon.....

main hoon radha
main hoon maya
main hoon krishna - kanhaiya !!!!!!!

kalpana aur khuda

aaj bhi kayi dafa
raat ko jane kitne baar
main yun hi achanak
sote sote uth jata hoon
aur moondi hui aankhon se hi
jane kuchh khojne lagta hoon
...
thodi saanse leta hoon
aur ek gilas pani pita hoon,
bistar pe mere jism
aur adhuri silvato.n ke siva
kuchh bhi nahin hai...
haan tootate palastar ki khali badan pe
ek khidki bhi hai
jismein saankal bhi nahin hai
lekin vaqt ki zard chabhi
khidki ko kabhi khulne nahin deti,
khidki ke palle ghuma kar
intejar karti aankhon se
bahar ki harek cheej dekhne lagta hoon
aur aise ki jaise
main harek cheej se
tumhara chehra milana chahta hoon
kahin tumm ye to nahin
kahin tumm wo to nahin
kya pata
tumhari aawaz ne malay ka
aks odha hoga
bina gaat ke
tumm us pile phul ke jaisi lagti hogi
kya pata....

ya to aadmi pagal hai
ya phir pura bewkoof...
ya phir hai ye
ek nishthavan bhakti
ki harek cheej mein
buss tera aks dhoondhta hai
tu meri kalpana hai?
ya tu khuda hai?

Ek nazm

Main janta hoon
aaj bhi koi hawa soyi hai
usi chand ki palkon pe
jiske sine pe har roz main
kabhi raat kabhi andhera rakh deta tha...

bohut arsa hua
maine rishto ke pashmine ko nahin palta
bohut arsa hua
maine tumhare lams ki kursi nahin hilayi

vaqt aur khawab ki parton mein
har sham patli si nazm hua karti thi
harek gujarte hue sitare
ek pal ko ruk jate aur
aur nazm ki dheemi dheemi dhun suna karte the...
kabhi tere hothon se rang chura leta
kabhi tere julfon se raat chura leta tha
lekin har sham maine nazm ko
babsta puri shiddat se banaya tha...


kyun nahin zindagi se
phir ek nazm chura loon
aur teri julfon se thoda raat chura loon
nazm ki khomsh raat mein
main aankhein band karna chahta hoon
tere rishtey ki chhuan mein
ek khwab jina chahta hoon....

Do lamha

.... Main nahin chahta tumse pura aakash
mujhe buss,
do lamha
apne god ka
aasman de do..


main rakh loonga...
bhar ke un lamho mein
teri aankhein, tera chehra
aur tere rooh ki bhini khushboo
jab bhi kabhi dhoop hogi...
aur kahin nahin hoga pani tak
un lamho ke sahare
main phir se jee loonga
do lamha buss
tere god ka aasman...

Nukkad

Yun hi jab kabhi
aate jate subah sham ki dukan pe
dikhta rahta hai
meri khwahishon ka chehra
kabhi kuchh kharid leta hai
kabhi kuchh bech deta hai...

rishtey aur raston mein jyada farq nahin hota...
miltey and juda ho jate hain...

kal hi kisi ne
mere khwaon ka rasta becha hai(kahan?)
nukkad (pe)
-sirf natak ke liye nahin banayi jati
-yahin pe subah aur sham ki dukan hua karti hai
-harek rasta mil jata hai

kuchh raste bik jate hain
kuchh kharid liye jate hain

usi zindagki ki nukkad pe
jahan subah aur sham ki dukan lagti hai

Rishta

Maine kabhi nahin socha tha
ki gaon ke bahar,
ek garib ki chhoti si dukan par
seema har sham apni sinduri
chunari, udate-udate
yun hi aam-pachak lene chali jayegi...
aur nishal bhi
ek na ek goli bacha kar rakhta hai
ki tera intejaar karta hai,

aakhir aisa kya dekha tha
nishal ne teri aankhon mein us roz,
jab pahli dafa tumm aayi thi
apni bheegi sinduri chunari mein,
jo barish padne se
ek thake hue sham ke jaisi ho gayi thi...
lekin nishal ki aankhon mein
ek subah ka saya tha...

haan usi subah ki
anvarat pani ki satahon par
main ek pal ko rahta hoon
aur phir agle pal
kahin kho jata hoon...

aaj nishal ki aankhon mein !!!

-Rishta

Khat...

khat

khat ek khali deewar hai
jahan humm apni aankhon se
apne rooh ke dard ko khatey hain
ki koi hai us taraf
jo kabhi na kabhi
in lafzon ko sunn lega
aur is ankahi deewar ko gira dega...

falaq pe daudati rekhaon pe
apni khwabon se
aksar main khat likha karta hoon
jo kahin na kahin chand se milta hoga
aur wahi rohini ki rekhaeyn
kabhi na kabhi
uski aankhon tak pahunchega
tab kya uski saansein
samajh nahin payegi
ye chand, ye roshini, ye rekhayein
usase kuchh kahna chahti hai
uski bhi aankhon se
kuchh sunana chahti hai..

khat...
wo takiya, wo raat, wo khwbon ke parde
jiski silwaton mein
dhadkan sahar tak zinda hai
wo khat hai...
harek jism ki ragon mein
mitti mein dabi
wo pankhon ki kahani
kshitij pe jise maine
sadiyon se likha hai
wo khat hai...
khat hi saanson ke pahle ki nazm hai
khat hi saanson ke baad ki khamoshi hai
khat........