Ek chehra

Ek saya hai
ek lafz hai
ek jodi ankhein hain…

Jo gujarate vaqt ki khidki pe
baith kar maun...
....bas dekhti hai….

uski gili balon se
nikal kar kuchh kesh
hawaon mein
ek prashn bana dete hain…

Lagta hai khwab ke jaise,
sula doon kabhi..
unhe apne sine par,
Apne hathon se chhookar
uske mathe pe
laga doon abhi…

Uski chhoti si kaan ki
chamakti bali…
Jaise amavas ko bhi
kahin se 2 moothi chand mil gaya ho…
khwaishon ki koi dher nahin hai
bus halka sa
usne mujhe pahen rakha hai…

Uski shunya ko jhankti aankhon
se laga hua
pyara sa gaal…

sadiyon se khidki ke samne ka chehra
badalta rahta hai,
uske shirt ka rang
uski ungliyon ka aakar
hatheli ki rekhayen
aur hathon ka pasina badalta rahta hai…

wo masoom se
komal pyare se gaal
uske khamosh aankhein
udte hue kesh
aur kan ki bali..

sab kuchh
samarpit hai….

Andhera hoon main

Jab dharti ki aankhein
kshitij ke par
sans leti hai...
aur dabe panv
khamosh parinde
andhere ke chhote chhote tukde
aakash ki surakhon se
girate hain…

aaah….
ek arsa hua
andhere ko piye hue
ek arsa hua
apni nason mein
andhere ko meshsus kiya…

ek khawish ki
mere jism ka por por
andhera ho jaye bus…

kahmoshi yahin se sans le
chand isi pe geet likhe
aur uski julfon mein
main bus jaoon….

sharir ki simayon se pare
udan hoon main…
andhera hoon main….

gili mitti ho jaoon main

Jab kabhi kamra khamosh hota hai
aur mera jism
us khamoshi mein lipta hota hai…

sochta hoon
apni ungliyon se hokar bah jaoon
aur gili mitti ho jaoon…
paas ki sukhi jameen par…

dharti bhi to jane
kitne janmo.n se pyasi hai….

chhoti nazmein...

mitti ka harek mukhauta
ek pyas se bana hota hai…

andhere ki patli chadar pe
jab aawazien girti hain
to mitti ka ek aur darwaza khul jata hai…

aane do abhi chand
ki gumsum si ye raat kate…

gir jane do thoda aaftab
ki gumsum si ye raat kate...

-----

Ye aakash...
Mujhko ek baat bata de

kaise itni khamoshi se dharti soti hai...
kaise itni khamoshi se puri raat bita leti hai....

Mujhko bhi wo hunar sikha de...
Mujhko bhi kuchh khamoshi de de...

-----

hai andhera bhi aur hai dhuan...
na saya koi deewar pe dikhta hai...
hai itni khamosi ki
meri sanson ka shor sunai deta hai...

khamoshi....

musalsal khamoshi !!!!

----


Divas ki parchhayi se
jab kabhi
Jism andhera hota hai….

darwaja band karne ka vaqt hua hai

vastra badalne ka vaqt hua hai

khwaisho.n ki sham hone vali hai
arpan karne ka vaqt hua hai….

----


Sinne mein aisi ek gahri si aawaz
jaise koi andhere mein
sannate ke bechho-beechh
shankh-naad karta ho...

Main swarp hoon

Jahan meri sharir ki seemayen khatam hoti hai
aur khali jagah shuru hoti hai...
Jahan suraj bhi doobta hai
Jahan khwab chhupaye jate hain
Jahan nazm likhi jati hai
aur Jahan dharti aansu bahati hai….

kabhi kabhi us jagah pe
apni aankhein rakh deta hoon….

wahan na roshni hoti hai
aur na hi andhera hota hai
bus geeli roshni ki aawazein
girti rahti hai…

vaqt apni aankhon se
kuchh sans leta hai…

aur meri aankhon se
ek aur khwab dhul jata hai...

main premi hoon…
main nishal hoon…
main swarp hoon…

---
*swarp : Jo swyan ko arpit hai…one who believe the most in the self

chhota aayina hoon main

Ghar ka darwaja khulte hi
pass ki deewar pe
tanga rahta tha main…

subah aur sham ki dhoop
mere chehre pe
jab bhi padti thi
mere ghar ki deewaron pe
sinduri geet gaya karte the…

Jab bhi log aate
meri aankhon se poochhte
"kaisi lag rahi hoon main...?"

Aaj meri aankhon pe
ek chasma laga diya gaya..
phir mere upar
ek curtain bhi tanga gaya...
phir mujhe utha kar
store room mien rakh dia gaya…

ghar mein dressing table aaya hai..

chhota aayina hoon main...

main nishal hoon

katra katra
mere jism se
mera chehra badal jata hai…

aayina mujhe dekh kar
ab sawal nahin poochhta
aankhein mujhe chhoo kar
ab ye nahin kahti ki
"kaun ho tumm?"…

sharir pe tange
sare vastra
mujhe pahchanne lage hain…

main nishal hoon...

main...aur tumm....

kabhi kahti hai
tumhari khamosh aakhein
batao to preetam...
mera rang kaisa hai
....
mmmmmmmmmmmmmmmmmmmm
samadar mein
suraj dooba kar
jab chand ko
dheere dheere kheench ke
falak pe lagta hoon

lamha lamha
falaq ke jism pe
tumhari aankhon ka
kajal lag jata hai
aur chand ki paridhi pe
tumhari aakhashi aankhon ka
noor najar aata hai
aur palak matkati rahti hai
chand sari raat...
aur main sochta hoon
ye chand ne kaise
tumhari aankhein churayi hogi...
aur ye falaq ne kaise
tumhara kajal churaya hoga...
....

kabhi kahti thi
tumhari khamosh aankhein
batao to preetam...
mera gandh kaisa hai

subah jab shab
ko halke halke
shafaq ke peeche
mod kar rakh diya tha

meri aankhon mein
chhupi hui
neend ki khushboo
aahista aahista
mere jism pe chha jati hai
aur pura din
ek ajeeb si hawa
mere jism ko sunghti rahti hai
jaise koi saya
dua karti rahti hai
kal raat..
maine teri aankhon se
khwab jo dekha tha

......
kabhi kahti hai
tumhari khamosh aankhein
batao to preetam
meri aawaz kaisi hai

subah ki pahli dastak
teri aawaz...
main aankhon ke
falak badal kar
khwabon ko halke halke
uthata hoon
khwaon ki kashmashahat
teri aawaz...
main apne jism ke
deewar ko
dhokar naya rang lagata hoon
ungliyon se kuchh
parchhayion ke chitra
bhi banaye
halke se khamoshi
ka diya
rooh ke kone mein lagaya
bus main hoon aur mera jism...
khamoshi rooh se nikal kar
mere aayine tak
pahunch jati hai
lekin aayine ki tej nazar
teri aawaz...

mere jism se mere rooh tak
faili hai teri aawaz
meri najar se mere gandh tak
faili hai teri aawaz
meri aankhon se mere khwab tak
faili hai teri aawaz

main hooon to teri aawaz
main na hoon to teri aawaaz
meri gati mein teri aawaz
meri shanti mein teri aawaz

kaynat ka har zarre mein
basi hai teri aawaz

suraj ka khilna teri aawaz
sham ka dhalna teri aawaz
chand ka pighlna teri aawaz
sitaron se milna teri aawaz

teri aawaz pe main saans loon
teri aawaz pe main marr jaoon

Rishta..

Rishta…

Kabhi apne room ki deewaron
ko apni ungliyon se chhota hoon
to buss rishta hi to hai
jo kahta hai -
nishal tumm akele nahin ho
main khamoshi se tumhare sath sota hoon
aur tumhare khwabon ko
apne daman mein chhupa kar rakhta hoon..

Rishta...
kabhi apni budhi aankhon se
apne safed balon mein
apni umra ki tnahayi ko dekhta hoon
to balcony mein baithi tumhari aankhein
mujhe phir se lapet kar
kahti hai -
rishtey kabhi budhe nahin hote,
aao tumhe dhalti sham ka suraj dikha laoon
aao tumhe ek baloon dila doon
aao tumhe ek chikki khila doon
meri dharti pe tumhara ishq
har pal nayi saans leta hai…

Rishta…
Jab bhi kabhi main
apni bahen khol khol kar
tumhare liye subah-sham chunta hoon
thodi si subah aur thodi si sham
fisal kar kahin dharti pe gir jati hai…
main apni nam aankhon se puri raat
diye mein apna ishq laga kar dhoondhta hoon…
...mere rishtey ko to buss pura khilona pasand hai..
tapti dopahri mein
pasine se lathpath
main dharti ki chhati pakad rota hoon,
tumm chupke se aati ho
apni aakash se bani chhati mein
mera moonh chhupa leti ho….
roti ho…
……….
….. nishal… kyun itna pyar karte ho mujhse??
…..meri aankhon se kahti ho…
main khush hoon tumhare sath… bohut khush…

Rishta......

Ishq itna mukhar kyun hota hai..

Yugon tak ye jism
apni dharti
apni deewaron ke beech sanse leta hai

kabhi achanak se
mere jism ki karwat pe
ek nazm utar jati hai

main sans rok kar
us lams mein utar jata hoon
us do lamhe ki zindagi ke liye...

deewar ki hathon pe
kuchh rekhayen ubhar jati hai
jiski tasveer
aankhon se bolti hai….

Ishq kitna mukhar hota hai..
Satya ki tarah khamosh kyun nahin...

kuchh khwab...

Maine bhi in aankhon se
kayi khamosh khwab dekhe hain
kuchh neele neele raat ke jaise
kuchh sinduri aakashi jajbat ke jaise

kuchh khawab
zindagi ki galiyon mein gir gaye
nanhi ungliyan kitna samhalegi…

kuchh vaqt uda le gaya
apni gili hawaon ke sath
jo mere sirhane har raat chala karti thi…

lekin teri yadon ke sukhe panne pe
abhi bhi kuchh khawab zinda hai...

main muntazir hoon

maine jab bolna bhi nahin sikha tha
aur mujhe koi bhasha nahin aati thi,

shayad tab se
meri aankhon mein
ek aks chhupa baitha hai
vaqt ke harek panne pe
maine kayi akshro.n se
us aks ko milaya hai
har koi apni syahi se
mere jism ko rangta gaya
lekin
wo shakhs kahan
wo aks kahan...
jo mere jism-o-jaan
se mil gaya...

aaj bhi meri aankhon ke parde
hata kar dekh lo
kuchh khawab us aks ko muntazir hain...

tumhari aankhon mein

humne phir se dekh li
do boond zindagi
tumhari aankhon mein

humne to bhar li
dono hathon ki bandagi
tumhari aankhon mein

humm kaise ashq bahayen
apni tanhayi ki
tumhari aankhon mein

Reincarnation of Love

Raat ki matkiyon mein
kuchh anjane se alap
kuchh andekhi aankhon ka vartalap...

Raat ...
jab andhere ke lifafe mein
sare sitare bator kar
chand ke us taraf chhipa deta hai
to fizan mein faqat khamoshi rah jati hai….
Jab shisam ke darakhton ke jungle mein
dharti ki ek ek dhwani
tamas chhupa kar
raat ke sajar pe apni aakhein tang deta hai
to fizan mein faqat khamoshi rah jati hai….

Aakash ki patli si chadar ki
mulaaym pankh vali satahon pe
jahan na hawa hoti hai
jahan na tarang hota hai
tumm utarti ho….
swar-lahri ban kar….

manav ki aankhon mein
ek ajeeb sa expressionn ban kar
kabhi sur ban jati hai kabhi nirtya ban jati hai
kabhi alap ban jati hai ya kabhi nartan ban jati hai
ya kabhi nrityalap…
uske pure jism mein
uski dhadkan mein
uski aatma mein…
ungliyon se hokar bahti ho…
aaaaaaaaaaa….. (jaise ki koi ga raha ho)
aaaaaaaaaaa…..
aaaaaaaaaaa…..

Shrishti ki khamosh canvas pe
nirantar nirvikar
uski ungliyan chalti hai

kabhi uski ungliyon mein
veena dikhti hai
kabhi rang dikhta hai
kabhi nataraj
kabhi shrishti ki aawaz…

samast rajni ki samay-rekha par
samandar ki lahrein sur-manthan karte hain

amurtan
nishpandan
shilpakt
nrityalap...

uske jism ke hisse tutate jate hain
aur kriti banti jati hai
brahmand ki aroop rekha mein
manav ki aatma roshni ban kar
mayakash ka tamas todta jata hai…
aur manvi mukt hoti jati hai…

veena tut jati hai
rang bikhar jata hai
natraj toot jata hai
varf se bana shilp toot jata hai
aur manavi mukt hoti hai…

usha ki pahli kiran se bhi pahle
manav-manchan se
shriti ke canvas pe
mayakash ki varf se
manvi mukt hoti hai…

khamoshi khamosh hai
malay saans le raha hai

aaj vyakaran ka janm hua hai
aaj sa-re-ga-ma-pa-dh-ni-sha bani hai
aaj dha-ge-na-ti-na-k-dhi-na avtarit hai
aaj ishq ki tasveer bani hai…
aaj manvi maya se mukt hai…
ishq ke nishal mein…