sham ki khamosh sadak pe
antheen gadiyon ko
nirantar daudate hue
dekhta hoon....
to bus yahi khayal aata hai ki
jane kaun si zindagi
bhari hai inmein,
bus daudte hi rahte hain....
wahin se thodi doori par
suraj doob raha hai
aur uske kuchh meter pahle
shayad ashok ke dher sare
lambe lambe ped lage hain...
aur main thahar jata hoon
.
.
.
ek ajeeb si smirti se
bhar jata hoon,
shayad main bhi
in pedon mein se ek hoon
aur tum bhi
in pedon mein se ek ho
aur hum dono
ek doosre ke pass
jane kitne janmon se
khade hain bus...
No comments:
Post a Comment